എഴുത്തുകാരികൾ

എഴുത്തുകാരികൾ അടുത്ത ജന്മത്തിൽ കാറ്റായി ജനിക്കും

ഒരു മുളങ്കുഴലിന്റെ സുഷിരങ്ങളിൽ നൃത്തമാടി അതിൽ സംഗീതം തീർക്കും

മണൽക്കൂനകളിൽ വിരൽത്തുമ്പുകൊണ്ടു കഥകളെഴുതും

കുഞ്ഞു മേഘങ്ങളെ മാറിലൊതുക്കി പറന്ന്

എരിയുന്ന മണ്ണിലേക്ക് മഴയായി പതിക്കും

നിറകണ്ണുകളിലേക്ക് തണുപ്പായി വീശി

കണ്ണീരിനെ കവിതയാക്കി മാറ്റും

കാണാനാവാത്ത ചതുപ്പുനിലങ്ങളിൽ

വേരുകൾ കൊണ്ട് ശ്വസിക്കാൻ പഠിക്കും

തനിക്കുമേൽ വളരുന്ന നുണകളിലേക്കു ചുഴലിയായി ആഞ്ഞടിക്കും.