പറഞ്ഞതിനും പറയാതിരുന്നതിനും ഇടയ്ക്ക്
ബാക്കി വന്ന ഒരു വാക്ക്
ഉറക്കത്തിനും ഉണര്‍വിനും ഇടയ്ക്ക്
നഷ്‌ടമായ ഒരു സ്വപ്നം
കണ്ണിനും കണ്ണാടിക്കുമിടയില്‍
മങ്ങിപ്പോയ ഒരു പ്രതിബിംബം
ചോദ്യത്തിനും ഉത്തരത്തിനും ഇടയ്ക്ക്
വിട്ടുപോയ ഒരു ശരി
അവ
അലഞ്ഞുകൊണ്ടേയിരുന്നു
ഇനിയൊരു ജന്മമുണ്ടെങ്കില്‍
ഒരു ഭൂതമായി ജനിക്കണം
ഒരു ചിപ്പിക്കുള്ളില്‍ ഒതുങ്ങാനും
മലയായി വളരാനും അതിനേ കഴിയൂ
എന്നിട്ടു വേണം
വാക്കുകള്‍ക്കിടയില്‍ പതുങ്ങിയിരിക്കാന്‍
ഓര്‍ക്കാപ്പുറത്ത് ആഞ്ഞടിക്കാന്‍
ദ്രവിച്ചുതുടങ്ങിയിട്ടും കാത്തുസൂക്ഷിക്കുന്ന കൊട്ടാരങ്ങള്‍
ഒരു നിമിഷം കൊണ്ട് ചാമ്പലാക്കാന്‍
ഉടച്ചുകളഞ്ഞ കുടത്തിലെ സ്വാതന്ത്ര്യം
തിരിച്ചു പിടിക്കാന്‍.
പങ്കുവെക്കലിന്റെ തുല്യതയില്‍
രൂപം നിങ്ങള്‍ക്കും നിഴല്‍ എനിക്കും ലഭിച്ചപ്പോള്‍
പിന്നിട്ട ദൂരമത്രയും
നിഴലിനു പിന്നില്‍ ഒളിപ്പിക്കാനായിരുന്നു എനിക്കിഷ്ടം
ചിരികള്‍ നിങ്ങള്‍ക്കായി പങ്കുവെച്ചപ്പോഴും
മാറ്റിവെച്ച കരച്ചിലുകളിലായിരുന്നു നിങ്ങളുടെ ശ്രദ്ധ
ചോദിക്കരുത്;
ചിരിയില്‍ പൊതിഞ്ഞ കഥകളെപ്പറ്റി,
പങ്കുവെക്കനാവാത്ത നിഴലിനെപ്പറ്റി.
കണ്ണിനോടു പിണങ്ങി
കണ്ണുനീര്‍ പടിയിറങ്ങിയപ്പോള്‍
കനലെരിച്ചു ശുദ്ധമാക്കിയെങ്കിലും
തിരിച്ചുവിളിക്കുവാന്‍ ഒരുങ്ങിയ മനസ്സിനെ
ചങ്ങലക്കിടെണ്ടി വന്നു.
എന്നിട്ടും,
ചങ്ങല പൊട്ടിച്ച് ഇറങ്ങിയപ്പോഴൊക്കെ
അത് കണ്ണുനീരിനെ തിരഞ്ഞുകൊണ്ടിരുന്നു.
നമുക്കിടയില്‍ ഒരിക്കലും ഒരു മഴക്കാലം ഉണ്ടായിരുന്നില്ല
ഒന്നുകില്‍ വേനലിന്‍റെ തീക്ഷ്ണത
അല്ലെങ്കില്‍ മഞ്ഞിന്‍റെ മരവിപ്പ്
പെയ്യാത്ത ഒരു മേഘക്കീറ് ആദ്യമായി
എനിക്ക് സമ്മാനിച്ചത്‌ നീയായിരുന്നു.
എന്നിട്ടും നീയറിഞ്ഞില്ല
പിന്നീട്,
എന്‍റെ മുകളിലൂടെ പെയ്യാത്ത മേഘങ്ങളുടെ
നിലയ്ക്കാത്ത പെയ്ത്തായിരുന്നുവെന്ന്.
© Free Blogger Templates Blogger Theme by Ourblogtemplates.com 2008
Back to TOP
